爺爺

choleuk

小弟自小生長在大家庭，不是富貴，但好幸福，有好多我最愛既家人陪我成長。
由0歲到10歲，我都係由爺爺帶大，同時有三個家姐（2個堂家姐）都同我一齊成長，日子一天一天過，轉眼間我地都大了，爺爺好不容易咁做左3次大既心臟手術，捱過左11年，到我18歲嗰一年，爺爺要走了。
經歷分享，要開始了。好記得，我18歲嗰一年，突然既一個晚上，我發左一個夢，正正我跪係我爺爺既靈堂，行家屬謝禮，一剎那間，我醒左。
睇睇個鐘，凌晨4點，當時我定神一下，想清楚，當時我爺爺根本無事，但係我心情好不安，於是即時叫醒爸爸媽媽，同佢地講，一定要明日同爺爺飲茶（當時我地一家4口已無同爺爺麻麻住）。
平時既爺爺，一向看行看素，食飽就走。但當日，呢個爺爺一反常態，開開心心同我地座低飲足3個鐘茶，仲有，指定要我請，哈哈。
飲呢一餐茶，我好開心，同時我更不安。爺爺身體一向不好，但行得走得，70歲人，頭腦清醒的。係一個星期後，爺爺入院了，都到最後階段，主診醫生交代我們全家，爺爺過不了1天。當晚爺爺已昏迷，幸好，全家到齊爺爺還在，當人齊時，我用手打開爺爺眼皮，佢既眼神，見到全家，好安慰....轉眼間，凌晨4點，只有我同我家姐，姐夫3會守係爺爺床邊，佢地兩個都訓左。當時我好清醒，見到兩個（人）來講：係時候走喇，xxx!
我心想，我係來守住我爺爺，邊個都唔帶得走！唔知幾時我再次訓左...到早上7點，爺爺還在，我醒了，由於全晚無返屋企，座車回家沖個涼，在的士上，我又見到爺爺，佢拍住我膊頭，乖孫我走喇。我即時係車成個人彈起，同時姐姐打來：爺爺剛剛走了...
其後，我一直都有夢見爺爺，老實講，我幾乎每逢新年前都夢見一次，爸媽都有見過，報夢時間幾乎相同。
每一次我遇到挫折時，都聽到爺爺既勉勵，我可以講，我不是太掛念而夢見爺爺，因為爸爸都同我發同一內容、場境既夢，大概這就是爺爺對我們既愛。
希望爺爺係另一個世界過得快樂。

Marron

- -很靈異......

croke

好感人!